Per il presidi da la partida crisitiandemocratica candidescha sulet Gerhard Pfister (53) dal chantun Zug.
El sesa dapi il 2003 el parlament a Berna ed è dapi lura commember da la cumissiun d’instituziuns politicas dal cussegl naziunal. Pfister sa posiziunescha savens dretg dal center politic e votescha er savens cunter l’opiniun da sia partida.
Pfister ha fatg matura a la scola claustrala a Mustér. El è da professiun scolast da filosofia e tudestg. Dapi il 1994 è Pfister maridà ed abitescha ad Oberägeri.
