Il Cussegl fedeal ha uss tramess la fatschenta en consultaziun. El suonda uschia a la moziun dal cusseglier dals chantuns grischun Stefan Engler (PCD) ch’il parlament ha approvà l’onn passà.
Problems cun animals da rapina
Ils problems existan dapi ch'animals gronds da rapina han reconquistà spazi da viver en Svizra, scriva il Cussegl federal. En la revisiun da la lescha da chatscha propona el che betg mo singulas animals pon vegnir sajettads mabain er entirs trieps pon vegnir regulads. Sco motiv per talas mesiras numna il Cussegl federal la periclitaziun da la varietad da las spezias, ni sche umans èn periclitads ed ils animals fan gronds donns malgrà mesiras da protecziun.
Cumpetenzas repartidas da nov
Da nov duai il Cussegl federal numnar ils animals che pon vegnir regulads. La decisiun finala ha alura il chantun. In donn concret na sto betg pli vegnir cumprovà. La populaziun da la spezia na dastga dentant betg esser periclitada tras las regulaziuns. En spezial numna il Cussegl federal il luf er sche lez è protegi tras la uschenumnada convenziun da Berna. Il Cussegl federal ha gia evaluà il 2013 sch'ina tala regulaziun da la populaziun da lufs è pussaivla senza cuntrafar a questa convenziun.
Examens da chatscha duajan vegnir unifitgads
Ina part da la revisiun da la lescha da chatscha furman ils examens da chatscha. Uschia duai la scolaziun ed uschia er ils examens vegnir unifitgads ed vegnir renconuschids vicendaivel dals chantuns. Las consequenzas per il chantun Grischun n’èn betg propi cleras. Sche Turitgais pon uschia ir a chatscha sin lufs en il Grischun è sulet ina speculaziun.
RR novitads 12:00