Las discussiuns aifer ils commembers ajan mussà ch'ils parairis davart la strategia d'energia 2050 sajan dividids, scriva Economiesuisse. Ord quai motiv sajan els sa decidids da na betg prender ina parola per la strategia d'energia 2050. Uschia sto la PPS cumbatter persula cunter la strategia, davart quella vegn votà ils 21 da matg.
L'incumbensa principala dad Economiesuisse sco organisaziun tetgala saja da represchentar las posiziuns communablas dals commembers, scriva l'uniun en ina communicaziun. En il cas da la strategia d'energia sajan las opiniuns divididas. Perquai desistia l'uniun sin ina parola. Singuls commembers sajan dentant s'exprimì ch'els veglian sa posiziunar per u cunter la strategia d'energia.
Gia il schaner aveva l'Uniun svizra d'artisanadi e mastergn decidì da sustegnair la strategia d'energia. La votaziun en questa chaussa è necessaria perquai che la PPS aveva piglia la chaschun per il referendum en questa chaussa. Da las partidas grondas sustignan tuttas la strategia d'energia 2050. Ils delegads da la PLD èn dentant sa decidids fitg cnap per sustegnair la strategia .
Independentamain da la votaziun per la strategia d'energia saja cler per Economiesuisse che las sfidas en la politica d'energia stettian grondas.
RR novitads 18:00