Uss ha il Tribunal federal abolì ina sentenzia dal Tribunal administrativ federal, ch'aveva confermà per la pli gronda part la decisiun da la Weko. Bain aveva la Swisscom ina posiziun da monopol tar l'incumbensa per ina rait d'informatica da la Posta, hai num en la sentenzia dal Tribunal federal.
La Swisscom n’haja dentant betg sfurzà pretschs nuncommensurads – ni envers la concurrenta Sunrise ni envers la Posta. En omadus cas manchia l’element dal sforz.
Sunrise aveva fatg recurs
La Posta aveva scrit ora il 2008 la realisaziun ed il manaschi d'in «Wide Area Network» per sias radund 2'300 filialas. La Swisscom ha survegnì l'incumbensa. Sinaquai ha la Sunrise ch'aveva tratg la curta, fatg ina denunzia tar la cumissiun da concurrenza. La Weko è lura vegnida a la conclusiun che la Swisscom haja cuntrafatg a la lescha dals cartels – cun avair malduvrà sia posiziun da monopol.
Cun giuditgar il proceder da la Swisscom cunter Sunrise e la Posta, aveva la Weko decidì in chasti da 7,9 milliuns francs. Il Tribunal administrativ federal ha lura refusà in recurs en chaussa da la Swisscom en ils puncts essenzials, dentant reducì il chasti sin anc 7,5 milliuns francs.
La Tagesschau da SRF aveva rapportà il november 2015: