Las chombras federalas s'occupeschan durant trais dis cun pendenzas per las qualas ellas na vevan betg temp durant las sessiuns ordinarias. Pervi da problems tecnics cun il sistem electronic da votar èn tschertas pendenzas vegnidas spustadas sin mesemna, il davos di dalla sessiun. Sin la glista da pendenzas stevan blers temas.
Las decisiuns èn survista
- Cunter projects d'abitaziuns pli pitschens en zonas da construcziun na duain uniuns betg pli dastgar far recurs. Il Cussegl naziunal ha decis da restrenscher il dretg da recurs cun 113 cunter 72 vuschs. Concret vai per impedir che tschertas gruppaziuns cun bleras resursas persunalas e finanzialas possian retardar projects.
- Da l’exteriur vegnan animals magari transportads plirs dis avant ch’els vegnan mazzads. Il Cussegl naziunal vul uss che tala charn vegnia declerada. El sustegna uschia ina moziun dals Verds en chaussa. Per l’ina sajan tals transports turmentus, per l’autra muntia tala charn ina concurrenza betg faira per ils purs svizzers che stoppia sa tegnair vi da reglas severas – hai num en l’argumentaziun.
- Persunas cun impediments duain pudair sa participar a la politica: Il Cussegl federal sto examinar mesiras per che persunas cun impediments pon esser part da la vita politica a moda autonoma. Tranter auter vai per exempel per ils custs per ina translaziun en lingua da segns en in cumbat electoral. Quels ston ils pertutgads actualmain pajair sezs.
- Simbols naziunalsocialistics – sco per exempel la crusch a crutsch – duain tant pli spert vegnir scumandads en Svizra. Il Cussegl naziunal ha approvà duas iniziativas parlamentaras en chaussa. Quellas pretendan da far ina lescha speziala per tals simbols.
- La Svizra na fa betg part da la task force che tschertga daners d’oligarchs russ. Il Cussegl naziunal ha refusà ina moziun dals Verds en chaussa. La collavuraziun actuala cun la task force bastia, quai han argumentà ils adversaris. En pli han els resalvas pertutgant l’independenza da la Svizra. Ils aderents èn stads da l’avis che surtut la Svizra stoppia surpigliar responsabladad, cunquai ch’ella saja in lieu da finanzas dumandà dals oligarchs russ.
- Il Cussegl naziunal ha cumplettà il program da legislatura dal Cussegl federal cun diversas finamiras: Tranter auter pretenda la Chombra gronda dal Cussegl federal da preschentar ina strategia per l’Ucraina. En connex cun la protecziun da l’ambient duaja vegnir sclerir, sche subvenziuns fan eventualmain donn a la biodiversitad en Svizra. Er en connex cun ils purs datti ina midada: Uschia duaja la Confederaziun garantir ad els pretschs fairs per lur products e restrenscher la birocrazia.
Per tge vai tar ils temas centrals?
Svizra duai agir pli consequent
La moziun pretenda da sa participar a la taskforce internaziunala per chattar daners d’oligarchs russ. La cumissiun responsabla ha proponì in Gea, quai cun stgarsa maioritad.
La maioritad è da l'avis che la Svizra stoppia far dapli per garantir che las sancziuns cunter la Russia vegnian realisadas senza largias. La minoritad chatta che la collavuraziun actuala cun la taskforce funcziunia bain avunda. Ultra da quai ha ella dubis areguard l'independenza da la Svizra.
Er il Cussegl federal refusa la moziun e renviescha als contacts svizzers cun gremis internaziunals che sa fatschentan cun las sancziuns cunter la Russia suenter l'attatga sin l'Ucraina. Las sancziuns eran vegnidas decididas suenter l'attatga sin l'Ucraina il favrer 2022.
Scumond da simbols da violenza
En il center da la debatta stat in scumond da simbols extremistics, rassistics e che glorifitgeschan la violenza. La cumissiun da dretg vul scumandar svelt simbols naziunalsocialistics ed en in segund pass ulteriurs simbols da violenza.
Simbols en connex cun il naziunalsocialissem ed il Terz Reich sajan identifitgabels pli facilmain che auters simbols extremistics, scriva la cumissiun. Quest proceder graduà chapescha ella sco cumpromiss per il Cussegl dals chantuns ch'è s'exprimì per ina regulaziun pli cumplessiva.
Oz èn simbols chastiabels, sch'i vegn fatg reclama per in'ideologia rassistica. Il parlament na vuleva fin ussa betg in scumond total, en spezial pervia da la difficultad d'ina definiziun dals simbols che duain vegnir scumandads.
Il Cussegl naziunal ha approvà duas iniziativas che pretendan da far ina lescha speziala per tals simbols.
Restrenscher recurs da construcziun
Er il terz di è vegn tractada ina restricziun dal dretg da recurs da las associaziuns. Cunter projects d'abitaziuns pli pitschens en zonas da construcziun na duain las organisaziuns da l'ambient betg pli dastgar recurrer. Protecturs da la patria e da la cuntrada vulan sa defender cunter il project da la cumissiun d'ambient.
La maioritad da la cumissiun da l'ambient vul impedir cun las midadas en la lescha davart la protecziun da la natira e da la patria che tschertas gruppaziuns cun bleras resursas persunalas e finanzialas pon retardar projects. Il Cussegl federal sustegna las propostas, inclusiv las excepziuns, per exempel per maletgs da lieus u biotops impurtants.