Co dumagnar la quarta revoluziun industriala, quai è la dumonda centrala dal Forum mundial d'economia 2016. Ni ditg pli simpel: co ir enturn cun tut las pussaivladads, che la digitalisaziun porscha.
In sguard sin il program mussa dentant, ch'i dà anc in auter tema, che vegn ad occupar ils participants dal WEF: la crisa da fugitivs.
Uschia duai tranter auter vegnì chattà soluziuns, co che la politica, l'economia e la societad duain ir enturn cun quella e surtut era cun la situaziun da segirezza.
Blers nums prominents
A discutar quellas dumondas vegnan era quest onn enturn 2500 participants. Tranter quels divers primministers, sco Manuel Valls da la Frantscha, David Cameron da la Gronda Britannia ni era Alexis Tsipras da la Grezia. Era a Tavau vegn Joachim Gauck, il president da la Germania e ses collega d'uffizi da l'Ucraina, Petro Poroschenko.
Il Cussegl federal vegn ad esser preschent quasi en corpore, mo Simonetta Sommaruga na vegn betg ad esser a Tavau. Ed era la regenza grischuna è preschenta, cun mo in’exepziun: Martin Jäger na vegn betg ad esser preschent al WEF.
Dasper ils politichers vegnan era blers schefs d’interpresas grondas a Tavau, sco ils schefs da Coca Cola, UBS, Airbnb ni Microsoft.
Acturs, musicists e commembers da chasas roialas
Adina era preschents a Tavau èn «promis». Quest onn vegnan quai ad esser ils acturs Leonardo Di Caprio, Hugh Grant e Kevin Spacey. Er da la partida èn ils musicists Bono da U2 e Will.i.Am da The Black Eyed Peas.
Ed era saung blau è preschent a Tavau: il retg e la regina da la Belgia, las reginas da l'Ollanda e da la Jordania, il prinzi Albert da Monaco ed il prinzi ereditar da la Norvegia cun sia dunna.