L’avrigl 2023 aveva la chantadura Chiara Jacomet gia publitgà ses album cun il titel «Tgei ei feminin?». Uss, pli ch'in mez onn pli tard, vegn battegià in album cun il num «Tgei ei masculin?» en la Werkstatt a Cuira. Il messadi che Chiara Jacomet e Momo Kawazoe integreschan en quel, tematisescha la «Body Positivity» – pia ina tenuta positiva envers il corp – ed era che mintgin dastga amar e viver sco el vul.
Dentant, tge è atgnamain «masculin»? Las duas dunnas han ina clera opiniun areguard questa dumonda.
La dumonda «Tgei ei masculin?» na vulain nus atgnamain gnanc respunder en noss texts, perquai ch’i na dat betg in dretg u in faus. Mintgin duai avair la libertad da furmar sez in’opiniun davart la tematica.
La dumonda sco tala possia forsa intimar da metter en dumonda las normas che defineschian co ch'in um haja dad esser e co ch'ina dunna stoppia sa cumportar. S'allontanar da las normas fixas e dals maletgs classics – quai è la devisa che «ladunna» vul tranter auter intermediar cun il nov album.
Momo Kawazoe fa igl arranschament per la band. Ella na chapescha betg rumantsch. Dentant per ella na saja nagin problem d’arranschar las cumposiziuns da Chiara Jacomet en il stil da electro-pop. Ellas sajan in team ed ellas sviluppeschian communablamain quai che vegni presenta sin tribuna.