Fin ussa mancava in urden da traffic e da parcar harmonisà per las 12 fracziuns da la periferia. En in pèr fracziuns sa basa la vischnanca sin l'urden d'avant la fusiun, tar autras na datti nagin urden latiers. Cun la nova lescha sa mida quai: La vischnanca survegn cun la decisiun dal parlament la pussaivladad da reglar las taxas da diever en mintga fracziun individualmain. Uschia sappia vegnir desistì d'ina zona cun scumond da parcar en las fracziuns, uschia l'explicaziun da la cumissiun. Plinavant prevedia la lescha mo taxas per parcar in pli lung temp. Quai munta ch'ins po parcar en las fracziuns fin otg uras gratuitamain.
Il settember 2022 aveva il parlament communal da Glion refusà cun gronda maioritad il concept da parcar che la suprastanza aveva preschentà en ina sesida «extra muros» a Ruschein. Sin quai ha ina cumissiun cun commembers dal parlament e da la suprastonza survegnì l'incumbensa da surlavurar il sboz da lescha. Quai cun risguardar las particularitads da las fracziuns.
L'incumbensa «Maissen» è scritta giu, ma i suonda ina nova
L'incumbensa «Maissen» davart l'examinaziun da las prestaziuns e d'in pachet da mesiras per finanzas saunas ch'è vegnida inoltrada ils 30 da november 2016 ha il parlament scrit giu. Quai dentant sut la cundiziun ch'i dettia ina nova incumbensa che duai betg mo sa focusar sin il spargnar, mabain era sin l'effizienza da l'administraziun, quai tenor Claudio Quinter, il president da la Cumissiun da finanzas. La cumissiun vegnia ad inoltrar quella nova incumbensa en ina da las proximas sesidas.
Tenor Marcus Beer, il president communal da Glion, haja l'incumbensa manà tar enqual midada tar l'administraziun, ma tschertas pretensiuns na han ins betg pudì accumplir, sco par exempel da tegnair ils custs sin il nivel dal quint da l'onn 2015. Quai na saja betg pussaivel, uschia Marcus Beer. Ins haja da risquardar la careschia, novas incumbensas dal Chantun sco era il svilup da las pajas.
Il parlament communal ha plinavant approvà la revisiun parziala da la lescha da pumpiers da la vischnanca da Glion. Quai per motivs da divergenzas tranter la lescha e l'ordinaziun. L'adattaziun da la lescha pertutga oravant tut l'organisaziun e l'elecziun dil commando da pumpiers.
