-
Bild 1 von 4Legenda: La Sennaria Surselva a Mustér. RTR, H. Giger -
Bild 2 von 4Legenda: Il manader da fatschenta da la Bergsenn Marcel Singer. RTR, H. Giger
-
Bild 3 von 4Legenda: Il Rheinquellenkäse, davos dretg il chaschiel cun in reliev d'ina claustra e senester in reliev d'ina iva. RTR, H. Giger
-
Bild 4 von 4Legenda: Il Tannenbergkäse che vegn lantschà il november 2015. RTR, H. Giger
Sco il mander da fatschenta da la Bergsenn Marcel Singer ha detg ad RTR, sentia la Sennaria Surselva il ferm franc svizzer en 2 resguards. Ils Svizzers giajan pli e pli a cumprar sur ils cunfins, ed ils products sajan vegnids pli chars. La svieuta saja sa reducida quest onn. Cifras na vul Marcel Singer betg tradir. Mo els stoppian tschertgar mesiras co optimar il process da lavur. Consequenzas per ils 8 collavuraturs da la Sennaria Surselva na hajan questas mesiras betg.
Novs products sin fiera
La sfida saja da restar innovativ e vegnir cun products novs sin la fiera. Avant in onn ha la Sennaria Surselva lantschà en la Germania il chaschiel da la Tgina dal Rein. Uss il november vegn il Tannenbergkäse sin fiera. In extract da las plantas en il latg dattan in gust spezial a quest chaschiel. Nov èn era ils relievs sin las magnuccas che mussan ina claustra ubain ivas.
50% en l'exteriur
La Sennaria Surselva datti dapi 2009, l'october 2013 ha la Bergsenn surprendì ella. Il latg da bio vegn da la Surselva. La stad cura che las vatgas èn ad alp, dovra la Sennaria era latg d’ordaifer, per exempel da Tavau. Ils products da latg, surtut chaschiel, vegnan era vendids en l’exteriur (50%).
La Bergsenn posseda, ultra da la Sennaria Surselva, anc ina chascharia a Savognin. Questa interpresa è la pli gronda producenta da specialitads dal chaschiel da muntogna dal Grischun.