Surselva - Renaschientscha da la Rallye Gotthard è spustada

Atgnamain avessan autos da seria modifitgads per far rallyes gì da filar sur vias en Tujetsch, en la regiun d’Andermatt e Göschenen ed en la Val Leventina proxim settember. Mo sco il president dal comité d’organisaziun da la Rallye Gotthard, Bernhard Brägger, ha ditg a RTR sto l’occurrenza vegnir stuschada. Per pudair far las cursas saja quai da sa cunvegnir cun autoritads e proprietaris da las vias. Entant che quai è reussì en la Val Tujetsch ed en il chantun Uri, dovria quai en il Tessin dapli temp che quintà. «Jau hai sutvalità il temp ch’i dovra da discutar cun ils pertutgads» ha Bernhard Brägger ditg. I na gidia nagut da sfurzar atras insatge e perquai hajan ins decidì da spustar la rallye sin il 2017. Ina data concreta n’è anc betg vegnida definida. Ins veglia nizzegiar il temp per pudair organisar anc meglier l’occurrenza che duai esser persistenta ed era purtar insatge a las regiuns.

Budget da 350'000 francs

La lavur fatga fin ussa na saja betg fatga per il giat. Il sulet ch’i saja da far da nov saja da contactar anc ina giada ils pertutgads e guardar sch’els sajan era d’accord sche la rallye vegn fatga in auter onn. Co ils sponsurs reageschan sin la novitad n’è anc betg cler. Mo era quai vesa Bernhard Brägger sco schanza. I possia bain esser ch’in u l’auter sponsur seglia giu dal char, da l’autra vart hajan ins temp da tschertgar ulteriurs sponsurs. Calculà vegni cun in budget da 350’000 francs. Sper ils sponsurs han ils participants da pajar in daner da partenza.

Reactivar suenter 33 onns

L’idea è da reactivar la Rallye Gotthard ch’è vegnida manada atras l’ultima giada l’onn 1983. Gia da quest temp vegniva fatg cursas sin vias lateralas en la Val Tujetsch. La rallye consista ord pliras cursas sin vias chantunalas u era lateralas, natiralas ed era cun cuvrida da catram. Sin questas vai dad esser il pli svelt. Tar la cursa vegnan dentant era quintads ils trajects che han da vegnir surmuntads per vegnir da cursa tar cursa. Là han ils automobilists da tegnair en ina sveltezza media e da sa tegnair vid las reglas da traffic. Per la nova ediziun da la rallye datti ina categoria cun autos da seria bajegiads enturn per far rallyes ed ina categoria cun autos istorics. En tut quintan ins cun var 90 participants.