Tgi che va stedi cun il tren tras la Ruinaulta ha gia vis il plazzal tranter las staziuns da Versomi e Trin. Sin quai areal vegn construì ina galaria nova d’ina lunghezza da rodund 300 meters. Il plazzal ha dentant pliras sfidas. Per l’ina l’access al lieu, per l’autra la topografia e la finala era las perscripziuns tras las organisaziuns d’ambient, declera il mainaproject da la Viafier retica Markus Kunz.
Uschia han ils responsabels gì da chattar pliras soluziuns. Per vegnir al lieu cun las lavureras ed ils lavurers tegn il tren da la damaun extraordinari cun ils lavurers gest sin il plazzal e la saira il medem, uschia Kunz. Quai saja la soluziun optimala perquai ch’il viadi da la staziun da Trin al plazzal saja dapli ch’in kilometer e quai n’hajan els betg vulì responsar mintga damaun.
Construì ina pendiculara da material sul Rain
Per vegnir al lieu, surtut cun il betun, han ils responsabels construì ina pendiculara da transport sur il Rain. Uschia vegnian els d’evitar da stuair sgular trasora, accentuescha Kunz. La gronda part dal material vegn era transportà al lieu cun il tren, surtut il material per emplenir davos il mir.
Cunquai che la galaria vegn construida tut da nov, vegn quest onn construì il mir. Quai che muntia blera lavur. Sin quest mir vegnia alura il tetg e sin quel anc circa dus meters material, uschia Kunz. L’idea saja ch’il material vegnia sur la galaria e direct en il Rain. Per uss vegnir pli effizients han ils responsabels construì in segund binari davos il mir. La finamira è da transportar il material cun il tren e cura che las lavurs èn finidas alura vegn il binari allontanà.
Auts custs per la segirtad
La Viafier retica investescha en l’entir project radund 18 milliuns francs. Era vegnan las saivs da segirtad construidas mintgamai da las varts avant e suenter la galaria. Finidas duajan las lavurs esser sin la primavaira 2025.
