Dacurt ha il possessur da la papetaria Maggi a Glion Erich Puzzi communitgà, ch’el surprendia era la papetaria Pfeiffer. La papetaria Pfeiffer è domiciliada a Cuira e ha anc duas filialas a Tusaun e Scuol. Las duas papetarias na vegnan dentant betg fusiunadas. Ellas restan duas firmas independentas, ils dus logos Maggi e Pfeiffer vegnan ad exister vinavant. Erich Puzzi spera dentant da pudair profitar da sinergias cunzunt tar la cumpra da material.
Cumbat encunter grossists
Il pass da surprender la papetaria Pfeiffer saja ina decisiun per cumbatter ils grossists. En la regiun da Glion dettia adina dapli concurrenza entras grondas chadainas da negozis naziunalas e schizunt internaziunalas. Ils davos dus onns haja el bain pudì metter la papetaria Maggi a Glion sin ina buna basa cun mantegnair la svieuta e reducir ils custs. Tenor Erich Puzzi tanascha quai dentant betg.
![Erich ed Esther Puzzi en la papetaria Maggi a Glion.](https://www.rtr.ch/static/cms/images/960w/8d20b6.jpg)
Spargnar anc dapli ni engrondir
Per era surviver en l’avegnir haja el gì duas alternativas: anc spargnar dapli e reducir la purschida da la papetaria Maggi, ubain expander en novas regiuns e diversifitgar la purschida. Erich Puzzi è sa decidì per la strategia offensiva ed ha tschertgà pussaivladads da fitgar pe en la regiun da Cuira. El ha tschertgà pussaivladads per avrir in'atgna filiala a Cuira, spert ha el dentant vis, ch’ina collavuraziun cun la papetaria Pfeiffer fetschia dapli senn. Ella saja gia fitg enconuschenta e cun las duas filialas a Tusaun e Scuol gia preschenta en tut il Grischun.
![Survesta da las filialas da Maggi e Pfeiffer en il Grischun.](https://www.rtr.ch/static/cms/images/960w/4c8d05.jpg)
Success sin basa da trais cumpetenzas
Plinavant saja la Pfeiffer fitg cumpetenta sin il sectur da mobiglias da biro. Per Erich Puzzi è quai ina da las trais cumpetenzas, ch’el vul promover e cun la quala el spera dad avair success en l’avegnir. Sper la cussegliaziun concernent mobiglias da biro duajan las duas papetarias era sa differenziar da la concurrenza entras ina cussegliaziun persunala dals clients ed entras in service per material da biro per interpresas.