Suenter l'Indoor Festival da quest onn a Mustér fan ils responsabels ina bilantscha maschadada. Vegnì saja surtut il publicum da pli baud, mancà in pau haja il publicum pli giuven, hai num. Tenor il president dal comité d'organisaziun Florian Zanin èsi surtut la saira dal venderdi che fa in pau mal il venter. Uschia stoppia il comité d'organisaziun evaluar da rudent il festival da quest onn ed ir anc ina giada sur ils cudeschs. Pir suenter possian ins decider, sch'i dettia l'auter onn puspè il festival.
Preparativas per la terza ediziun
Il festival è il terz suenter il revival da l’occurrenza il 2021. Per il comité d’organisaziun èsi stà quest onn in zic pli simpel da vegnir tar las bands, perquai ch’ins ha gia en quels trais onns pudì far in num en la scena, ha declerà Florian Zanin. Uschia avevan els ensemen relativ svelt ils protagonists da quest onn ed era l’ulteriura organisaziun ha funcziunà fitg bain.
Era han ils organisaturs quest onn ina purschida gia la sonda suentermezdi, uschia vegn organisà ina fiera da plugls, nua ch’ins po vender instruments ed era ina discussiun da podium en cooperaziun cun l’uniun Graubünden Musik.
Blera musica per giuven e vegl
Il venderdi saira è surtut d’udir musica da hip-hop en il center Fontauna a Mustér. Uschia cumenza la saira cun Clique 713 ina gruppa grischuna e cuntinuescha cun Teuterekordz da Berlin. L’act principal dal venderdi è KT Gorique ina artista da la Svizra romanda enconuschenta sur ils cunfins svizzers ora. La sonda cumenza la party cun il sulet act rumantsch, numnadamain cun Dario Hess. El vegn a preschentar era ses nov album. Alura suonda Zian ina band da Basilea ed il punct culminant è alura Stefanie Heinzmann. Il venderdi sco era la sonda saira vegn in DJ a metter si musica e il viadi a chasa è garantì tras bus da notg che curseschan fin a Cuira.
Prevendita sco ils ultims onns
La prevendita è in tema difficil, di Florian Zanin. Quella è era quest onn sumeglianta sco ils onns passads. Els sperian sin mintgamai 450 persunas per saira e lura sajan els cuntents ed ils custs cuverts, di Florian Zanin. Ma natiralmain haja quai anc bigliets e la halla pudess era tschiffar fin a 1’000 persunas per saira, ma principal saja per els da pudair porscher a tuts ina bella saira nua ch’ins po emblidar ils quitads, accentuescha Zanin.
