La regenza prendia per enconuschientscha che l'agir da las persunas pertutgadas saja stà en urden. Sin fundament dal rapport dettia però basegn d'agir en connex cun la governance, hai num en ina communicaziun.
Il rapport mussa era ch'i dat basegn d'agir en il sectur da governance, cunzunt en il sectur da decleraziun e puncto conflicts d'interess. Nus vulain uss ensemen cun il cussegl da banca prender sut la marella il rapport e guardar co nus vulain ir en il futur.
Perquai veglia la regenza grischuna sa barattar cun il cussegl da banca. I giaja cunzunt per puncts cumplessivs sco la lescha da la Banca Chantunala, per las finamiras dal proprietari, per il concept da survigilanza da la regenza ed era per la dumonda sche la garanzia chantunala è anc confurm al temp. En in'analisa cumplessiva davart la situaziun vul la regenza sclerir quests puncts. Quai giaja dentant in temp, uschia Martin Bühler, uschia ch'i saja pir da quintar proxim onn cun resultats.
Dumondas or dal Cussegl grond
Era deputadas e deputads èn sa fatschentads en l'ura da dumondas cun la Banca Chantunala – la gronda part da las dumondas ch'èn vegnidas inoltradas en il decurs da las davosas emnas èn gia vegnidas respundidas il gliindesdi cun la communicaziun da la regenza. Ina u l'autra dentant betg, tranter auter èsi er ì per la rolla e las investiziuns dal president da la banca Peter Fanconi.
Nus beneventain bain che la regenza prenda sut la marella la governance, avessan dentant era spetgà che las relaziuns tranter Peter Fanconi e René Benko vegnan examinadas pli detagliadamain.
Tge che pertutga las examinaziuns en quest connex n'è la PPS betg cuntenta cun il rapport ch'è sin maisa ed era betg cun las mesiras che la regenza ha annunzà. Ella spetga da la regenza ch'ella prendia sut la marella pli en detagl l'agir da Fanconi. Per che quai vegnia era fatg sco giavischà da la PPS vul ella tenor Walter Grass, il schef da fracziun, inoltrar in'incumbensa correspundenta a la regenza e quai en la sessiun dal zercladur. L'Allianza dal Center sco era la PS èn uschenavant cuntentas cun las respostas dal minister da finanzas e spetgan uss sin ils resultats da l'analisa cumplessiva che la regenza ha annunzià.
Peter Fanconi ponderescha pass giuridics
Suenter ch'il rapport da Ernst & Young ha mussà ch'il president dal cussegl da banca, Peter Fanconi, n'haja fatg nagut fauss – ponderescha el da prender mesiras giuridicas, pervi da disfamaziun. Quai ha el ditg envers la gasetta NZZ. Encunter tgi ch'il plant sa drizzass, n'è betg enconuschent. Pussaivel fissi da prender en mira las chasas da medias ch'han – tenor l'opiniun da Peter Fanconi – purtretà fauss sia relaziun cun René Benko.
Per Peter Fanconi n'è l'istorgia cun Benko betg spectaculara. El haja emprendì d'enconuscher Benko il 2020 entras in collega d'ina autra banca. In pèr mais pli tard haja il conturn da Benko dumandà el per in contact tar la Banca Chantunala Grischuna. Per quel contact haja el procurà – quai saja la finala era l'incumbensa dal president dal cussegl da banca.
Vi dal process da credit per la gruppa da Signa na sa participescha el betg, sco il rapport da Ernst & Young mussa. El sa participescha dentant privat vi da trais interpresas da la gruppa Signa. Cunquai che sia participaziun saja stada lunsch sut la limita da 20% da vuschs u chapital – n'ha el betg stuì annunziar quai a la GKB.
Peter Fanconi deplorescha dentant che la banca chantunala è vegnida tratga en questa istorgia, che pertutga atgnamain il persunal, sco el ha ditg envers RTR ed il schurnal regiunal da SRF. El è sa perstgisà a chaschun da la radunanza da la Banca Chantunala Grischuna da sonda tar ils investurs e participants.
Rapport mussa: Cun il credit per Signa è tut en urden
Cun il credit per Signa saja tut en urden – quai è la conclusiun dal rapport da la firma da cussegliaziun Ernst & Young. La Banca Chantunala Grischuna n’haja betg ristgà memia bler, cura ch’ella haja concedì in credit da passa 60 milliuns francs al concern d’immobiglias Signa da l’investider austriac René Benko.
Tenor il rapport sajan tut ils risicos che la banca haja prendì en connex cun credits durant ils davos tschintg onns adina stads en proporziun, schizunt «conservativs».
Il rapport creescha la transparenza ch'è vegnida giavischada dal cussegl da banca.
En pli concluda il rapport, ch’i n’haja dà nagins conflicts d’interess areguard la rolla ch’il president da la banca haja giugà en chaussa. El na saja betg stà involvì en il process da lubir il credit.
Dubis davart l'objectivitad dal rapport
Quest rapport – che la GKB ha dà en incumbensa – è gia vegnì crititgà avant sia publicaziun. Quai perquai che la firma da cussegliaziun Ernst & Young che ha intercurì il credit è er il post da revisiun da la banca chantunala dapi l'onn 2008. Questa rolla dispitaivla dat da discutar ed è vegnida crititgada da pliras varts.
Quai na po strusch esser independent.
