Il concern d'energia grischun Repower ha fatg l'onn passà in gudogn da 300 milliuns francs. Quai èn prest 250 milliuns dapli ch'anc l'onn avant, sco quai ch'igl ha num en ina communicaziun. Il resultat da gestiun avant tschains e taglia sin rendita (EBIT) correspunda a 371 milliuns francs.
Sin il martgà d'energia internaziunal ha la Repower schizunt pudì nudar in resultat da record. Quai malgrà ch'ils pretschs èn smesads durant l'onn. Cunquai che la Repower aveva gia fixà ordavant ils pretschs per ses products n'ha quai però gì nagina influenza. Il concern ha plinavant pajà l'onn passà radund 60 milliuns francs tschains d'aua e taglias al chantun e las vischnancas. Il cussegl administrativ propona ina dividenda da tschintg francs ed ina dividenda speziala da trais francs.
Vender l'electricitad or da las atgnas ovras electricas e las participaziuns ad autras saja stà fitg profitabel, scriva l'interpresa. Ed era l'agen commerzi haja fatg in bun resultat e surtut profità da la volatilitad dals martgads. Plinavant haja il commerzi cun gas contribuì al resultat positiv – quai cun il ferm svilup dal commerzi cun il deposit da gas en l'entira Europa. Ils curs da valutas estras hajan gì in effect negativ sin las marschas pervia dal ferm franc svizzer.
Survista da las cifras
| En milliuns francs | 2023 | 2022 | Midada |
| Gudogn da la gruppa | 300 | 53 | +566% |
| Resultat da gestiun (EBIT) | 371 | 82 | +352% |
| Agen chapital | 1'141 | 888 | +28% |
| Quota d'agen chapital | 43 | 29 | +48% |
| Investiziuns | 102 | 89 | +15% |
Producì dapli energia
En summa ha la Repower producì 8% dapli energia (2’306 uras gigawatt). Per part haja en il Grischun pluvì 20% dapli ch'en media, dentant haja dà pli pauca naiv l'onn passà. Cumpareglià cun la media da plirs onns è la producziun d'electricitad en las atgnas ovras idraulicas dal Grischun stada per radund 10% pli bassa. Il motiv sajan stadas lavurs da renovaziun en differentas ovras electricas.
Bleras investiziuns
Pervia da la dumonda d'electricitad che crescha, investescha la Repower adina dapli en energia regenerabla. Uschia ha il concern d'energia grischun investì l'onn passà 102 milliuns francs.
En il rom dal Solarexpress planisescha la Repower duas ovras solaras autalpinas. Las ovras duain vegnir construidas sin il Vorab e Madrisa. Quests dus projects èn gia confermads da las vischnancas Laax e Claustra.
En il mantegniment e l'engrondiment da l'atgna rait d'electricitad en il Grischun haja la Repower l'onn passà investì stgars 25 milliuns francs.
Vista en il futur
Il martgà d'energia restia pervia da la gronda volatilitad fitg pretensius, scriva la Repower. Effects negativs sco nagina plievgia, clients che na pon betg pajar u effects dals curs da valutas estras, etc. hajan ina gronda influenza sin il resultat annual. La Repower haja ina gronda part da la producziun d'energia segirada entras atgnas ovras electricas, quai che vegnia ad avair in effect positiv sin l'onn da fatschenta 2024.
