Il mais d'avrigl è enconuschent per quai ch'el fa quai ch'el vul. Per tudestg datti il proverbi enconuschent «Der April macht was er will». Che quest proverbi è anc adina uschè gist sco il mument ch'el è vegnì inventà, ha la glieud vis la fin d'emna passada. Ils blers eran cun chautschas curtas e t-shirt en la citad, e sin il nas egliers da sulegl. Paucs dis pli tard è la temperatura sa midada pulit ferm – igl è vegnì bunamain 20 grads pli fraid a Cuira.
Nus avain dumandà la glieud sin via co els resentan questas midadas da l'aura. Intgins sentan las midadas vid il corp e tar auters va la luna en il tschaler sch'i vegn puspè pli fraid.
Questas midadas da l'avrigl èn enconuschentas – ma quant normalas èn ellas propi? La meteorologa tar SRF Daniela Schmuki declera l'aura variabla a Cuira cun il favugn ed il vent fraid. La fin d'emna èsi cun il favugn numnadamain stà 26 grads a Cuira. Cura che quest vent chaud è stà davent e la front fraida è arrivada, èsi directamain stà bler pli fraid en la citad.
Igl n'è segir betg insatge quotidian, ma gist la primavaira atgnamain tipic.
Daniela Schmuki di perfin, che questas midadas grondas possian capitar sur in di. Quai vul dir, ch'igl è per exempel fitg fraid la damaun e ch'i vegn lura fitg chaud il suentermezdi. Surtut la primavaira capita quai savens, perquai che l'aria è atgnamain anc fraida, ma il sulegl splendura gia fitg ferm. Las fasas da favugn portan las chaliras en l'aura d'avrigl.
Betg mo nus umans sentin questas grondas differenzas da temperatura. Sche la terra è ina giada fitg chauda e lura vegni tuttenina fraid, sentan las plantas ed ils animals quai. Daniela Schmuki di dentant che quai na saja nagut nov per la natira. Ils animals, las flurs e las plantas sajan disadas uschè grondas differenzas da temperatura.
Là nua che las plantas creschian, saja la differenza anc pli extrema. Sur notg sfradenta il terren numnadamain. Tranter auter en las muntognas èn las plantas sa disadas vi da bler.
Malgrà che quellas fluctuaziuns sajan nunusitadas, di Daniela Schmuki ch'ellas sajan normalas e tipicas surtut la primavaira.
L'aura d'avrigl ha er adina puspè inspirà la musica:
