Ariane Ehrat e la destinaziun Engiadina San Murezzan communitgeschan che la directura sa retira da ses uffizi la fin da zercladur 2017. Il motiv è tenor Ariane Ehrat l'introducziun da la nova organisaziun turistica per l'Engiadin'Ota che va en vigur dal 2018. Quai saja in bun mument per far ina midada di Ehrat. Ella è lura stada directura dad Engiadina San Murezzan durant 10 onns.
Planisar a lunga vista
L'annunzia da partenza uschè a lunga vista pussibilteschia a la destinaziun da preparar bain las novas structuras. Quai saja stà impurtant per ella, di Ehrat en la communicaziun a las medias. Il prim da schaner 2018 cumenza la nova organisaziun turistica en Engiadin'Ota. Quai suenter la midada da la refurma dal terrritori che abolescha ils cirquits. Uschia dovra il turissem en Engiadin'Ota ina nova structura.
Era Hugo Wetzel finescha sia incumbensa
Il president da l'organisaziun turistica actuala Hugo Wetzel deplorescha la decisiun dad Ariane Ehrat. Ella haja prestà buna lavur ed etablì per exempel la strategia da duas marcas cun Engiadina San Murezzan. Era offertas sco "Skipass inklusive" sajan d'engraziar ad Ehrat e ses team.
Era Hugo Wetzel finescha sia incumbensa sco president dad Engiadina San Murezzan per la fin dal 2017. Quai pervia da la limitaziun dal temp d'uffizi. Uschia sto Engiadina San Murezzan remplazzar tut las funcziuns strategicamain impurtantas. Quai gist en quel mument cura ch'ins sto era midar la structura e fabritgar si la nova societad d'aczias che duai esser l'organisaziun purtadra da la destinaziun a partir dal 2018. Wetzel ha ditg envers Radiotelevisiun Svizra Rumantscha RTR che el vesia quai sco schanza per novas persunas cun novas ideas e betg sco problem.