Sche la vischnanca da Surses discurra da digitalisaziun è quai in'autra situaziun ch'en la vischnanca Muntogna da Schons. Favugn è puncto digitalisaziun dal sectur da construcziun schizunt ina vischnanca da pilot. Different èn er ils puncts da partenza. Surses e Favugn dumbran passa 2'300 abitants e la Muntogna da Schons bun 300 persunas.
Giani Spinatsch è substitut dal chanzlist. Cun surpigliar avant in mez onn quella funcziun ha el er surpiglià la partiziun EDV e digitalisaziun da la vischnanca. «I na fa nagin senn d'avair ils differents programs e betg nizzegiar els» resumescha Spinatsch sia incumbensa. La fin finala saja quai in gudogn per tuts – per il persunal communal ed ils abitants. Cler saja dentant er ch'ins stoppia examinar bain nua che la digitalisaziun fa senn. Dumondas per exempel da lubientschas che vegnan d'arar n'hajan nagina prioritad d'instradar il process da digitalisasziun.
Digitalisaziun enstagl contact persunal?
La vischnanca Muntogna da Schons n'ha cun 300 abitants betg las capacitads persunalas da sa focussar sin la digitalisaziun, di la chanzlista Tina Sulser. Ella è l'unica collavuratura administrativa da la vischnanca. Natiralmain saja la pagina d'internet ozendi da tegnair actuala e nua ch'il chantun dumonda e pretenda d'esser digital fetschia ins tut ils sforzs necessaris.
Ma ella beneventa il contact persunal. En ina vischnanca pitschna saja quel contact da grond'impurtanza è Sulser persvadida. Ella numna l'exempel d'annunziar l'abitadi. Quai savessan ins far en furma digitala – ma il contact persunal al spurtegl saja pli custaivel per ella.
Ils plans da construcziun digitals
Favugn è ina da las otg vischnancas da pilot dal chantun Grischun che rimnan emprimas experientschas cun digitalisar ils process da las dumondas da construcziun. Per Jaques Bass, il manader da l'uffizi da construcziun da Favugn, ha la digitalisaziun en ses sectur mo avantatgs. Che Favugn è part da quella fasa da pilot saja in ulteriur mussament che la vischnanca saja innovativa.
Favugn haja ina grond'activitad da construcziun e cun la digitalisaziun sajan ils process singuls pli sperts e d'avantatg per tut ils involvats. Malgrà plans e process digitalisads haja el tuttina anc gugent la part analoga, di Bass. Uschia pendan er tar el en biro plans vi da las paraids.
