Las sfidas da l'Ospital chantunal dal Grischun èn er il 2023 restadas grondas. Quai cunzunt perquai che las tariffas sajan bler memia bassas e perquai ch'ils custs creschian ad in crescher. Quai scriva l'ospital en ina communicaziun.
Tuttina po l'Ospital chantunal dal Grischun preschentar in resultat annual positiv. Il gudogn 2023 munta a 2,6 milliuns francs. Cumpareglià cun l'onn avant è quai in minus da radund 80%. La svieuta da l'ospital è creschida per bun 9,4% sin var 516 milliuns francs. Impurtant da resguardar è dentant: Igl è l'emprima giada ch'il quint annual da l'ospital chantunal cumpiglia era l'ospital da Walenstadt.
Tenor Hugo Keune, CEO da l'Ospital chantunal dal Grischun, dastga l'ospital esser cuntent cun il resultat dal 2023, oravant tut perquai ch'i han gì cundiziuns pretensiusas. En la communicaziun accentuescha l'ospital che las tariffas memia bassas rendian pli e pli grev da porscher in provediment da sanadad d'auta qualitad. Las cassas da malsauns refusian tenor Hugo Keune d'auzar las tariffas u da resguardar la chareschia.
Per l'onn 2024 stat en il center che nus purtain las tariffas sin in nivel current.