La squadra dals umens ha munchentà ils quarfinals, malgrà ch'els han gudagnà dus da trais gieus. Lur davosa partida dattan els encunter ils slovaks minoritars dall'Ungaria. Quest duell decida tge squadra che finescha il turnier sin plazza 9 u 10.
Era la squadra da las dunnas ha gì pac success tar lur premiera all'Europeada. Ellas han pers omadus gieus da d’enfin ussa, encunter las Tudestgas da la Russia hai dà ina terrada da 9:0.
Rumantschas e rumantschs procuran per buna atmosfera
Dentant procuran ils Rumantschs e las Rumantschas sper il pastget da ballape per buna atmosfera. Ed era per il di da cultura, ch’è oz mesemna, ils 22 da zercladur, han las squadras trenà. Ensemen cun il chantautur rumantsch Pascal Gamboni han els emprendì in medley da chanzuns rumantschas tradiziunalas e pli modernas. Questas vegnan els a preschentar publicamain.
Pascal Gamboni è il trenader musical da las squadras
Sin il video che la CBR cultura ballape rumantsch ha publitgà sin sia pagina da facebook ves'ins las squadras e lur trenader musical, Pascal Gamboni en acziun durant las emprovas da chant.
L'Europeada 2016 è la terza ediziun dal turnier per las minoritads linguisticas en l'Europa. Quest onn ha quest inscunter sportiv/cultural lieu en il Tirol dal Sid. L'Europeada dura enfin sonda ils 25 da zercladur.
RR Actualitad 06:00