Ils liberals èn da l'avis che las reglas actualas bastian e ch'i na dovria betg novs scumonds – sco per exempel quel d'alcohol. Per quest motiv han els decidì durant lur sesida da fracziun da betg entrar en la debatta davart la lescha da chatscha.
Midà opiniun
I duai dar quatter dis supplementars en la chatsch ‘auta per schluppettar tschiervs e chavriels e per la paja duai la chatscha speziala vegnir sursanida. Quai è in dals blers puncts or da la proposta per la revisiun da la lescha da chatscha. L’idea per quests quatter dis supplementars è vegnida da la partida liberaldemocratica cun l‘incumbensa dal deputà Christian Kasper. Uss ha la fracziun dentant midà opiniun. Tranter auter perquai ch'ins haja sentì ch'i manca il sustegn per exempel da l’uniun da chatscha grischuna. Perquai haja la partida adattà l’opiniun.
Anc betg cler
Schebain la debatta vegn spustada u betg dependa da las autras fracziuns. Era da l’opiniun da betg anc debattar uss davart la revisiun da la lescha da chatscha è ina part da la fracziun burgaisdemocrata. Las autras fracziuns n'han anc betg prendì posiziun. Ils proxims dis dentant vegnan er ellas a communitgar lur opiniun.
Il Cussegl grond tracta la revisiun da la lescha da chatscha en la sessiun d'october.
RR Actualitad da la saira 17:30