Il chantun Grischun era fin ils onns 1960 fitg povers e fin oz èn las consequenzas per la populaziun betg perscrutadas. Quai duai sa midar.
Perscrutaziun dals destins da pertugads
Fin il 1981 èn persunas, savens flaivels u povers, vegnids plazzads cun mesiras repressivas. Dunnas betg maridadas ch’èn vegnidas en speranza han stuì ir en praschun, uffants èn vegnids plazzads en autras famiglias. La manadra da l’archiv cultural da dunnas, Silke Redolfi, less perscrutar ils destins dals pertutgads. 30 intervistas èn planisadas cun pertutgads e cun autoritads involvidas.
Collavuraziun cun igl archiv chantunal Grischun
L’archiv cultural da dunnas vul dar als pertutgads ina vusch. Els n’èn dentant betg ils sulets che fan perscrutaziuns davart il tema. Era l’archiv chantunal dal Grischun s’occupescha dals plazzads, però cun in’auter focus. En ils documents vegn chattà infurmaziuns davart l’agir da las autoritads fin 1981.
Quels stattan er a disposiziun per retschertgas da pertutgads. Cunquai ch’i sa tracta d’in mandat dal chantun, ha l’archiv chantunal in budget. Quel manca dentant a l’archiv cultural da dunnas. Il chantun discutescha dentant davart in sustegn finanzial per lur perscrutaziun.
Occurrenzas per animar pertutgads
Per far attent sin la perscrutaziun datti adina puspè occurrenzas. Tranter auter raquintan pertutgads lur istorgia da vita. Uschia duain auters pertutgads vegnir encuraschads da discurrer davart lur destin en la publicitad e da tematisar quai chapitel nair da la istorgia Grischuna.