L'anteriur uvestg da Cuira Vitus Huonder saja malsaun. Quai ha confermà envers kath.ch la dumengia il pader Pirmin Suter, il rectur da l'institut Sancta Maria a Wangs SG, nua che Huonder è en pensiun. L'institut è ina scola da la confraternitad tradiziunala da Pius. Huonder saja dapi intgins dis en l'ospital chantunal da Cuira, uschia ha ditg Pirmin Suter.
Bonnemain giavischa bun meglierament
Ses successur, l'uvestg Joseph Bonnemain haja visità el la dumengia en l'ospital. Quai ha la responsabla da communicaziun da l'uvestgieu da Cuira, Nicole Büchel, communitgà sin dumonda da kath.ch. Bonnemain haja purtà palmas ch'eran vegnidas benedidas en il servetsch divin en la catedrala. «Els han discurrì in cun l’auter. L’uvestg Bonnemain ha giavischà in bun meglierament a l’uvestg emerità Vitus Huonder», uschia haja ditg Nicole Büchel.
Detagls davart la malsogna da Huonder na dat l'uvestgieu da Cuira betg enconuschent. «Quai na dastgain nus betg communitgar. Huonder, l'uvestg emerità da Cuira, po communitgar sez, sch'el vul quai.» Vitus Huonder ha manà l'uvestgieu a Cuira dal 2007 fin il 2019.