Tge è enconuschent ..
- La polizia ha entant arrestà quatter persunas suspectadas. Ils attentaders da Barcelona e quels da Cambrils tutgavan para tar ina suletta cella da terror. Ils attentaders avevian oriundamain planisà in'attatga d'ina dimensiun anc pli gronda. Suenter l'explosiun ad Alcanar n'hajan els però betg pli gì avunda material, uschia la polizia tar ina conferenza da medias.
La polizia tschertga entant vinavant l'attentader principal da Barcelona.
I na saja anc adina betg cler, tgi ch'haja charrà il camiun pitschen en la fulla da persunas.
Las infurmaziuns che l'attentader principal suponì saja vegnì sajettà giu da la polizia n'ha la polizia betg confermà.
- Tar l'attatga cun in auto a Cambrils è ina dunna morta, set persunas èn vegnidas blessadas. Sinaquai ha la polizia sajettà giu tschintg terrorists probabels. Las tschintas cun materia explosiva ch'ils umens purtavan, sajan stadas attrappas, communitgescha la polizia. Ils terrorists probabels eran para curt avant commetter in'ulteriura attatga da terror.
- Ordavant era in camiun da furniziun charrà en ina fulla da glieud sin «Las Ramblas» a Barcelona. Il dumber dals morts munta là a 13, almain 100 ulteriuras persunas èn vegnidas blessadas, 15 da quellas grevamain.
- Tenor il portavusch da l'organisaziun terroristica Stadi Islamic Amak sajan ils attatgaders schuldads da la gruppa da terror. Quai n'ha però anc betg pudì vegnir verifitgà.
La protecziun civila communitgescha che las unfrendas derivian da 34 naziuns, tranter auter da la Spagna, la Germania, la Frantscha, ils Pajais Bass, la Belgia e l'Italia. Indicaziuns davart unfrendas svizras na datti betg. Per confamigliars han las autoritads spagnolas endrizzà ina hotline: +34 900 400 012
![Il retg Felipe ed il primminister Mariano Rajoy durant la minuta da silenzi.](https://www.rtr.ch/static/cms/images/960w/464ebb.jpg)
I regia consternaziun
Vi dal parlament da la regenza da la Catalugna a Barcelona sgulatschan las bandieras dapi la damaun a mesa asta. La regenza ha ordinà trais dis malencurada suenter las attatgas. A las 12:00 hai dà ina minuta da silenzi sin la Placa Catalunya.
La chanceliera tudestga Angela Merkel ha condemnà l'attatga a Barcelona. Il terrorissem procuria per fitg tristas uras. El na possia però mai gudagnar, uschia Merkel a Berlin. Ord respect han las partidas decis d'interrumper il cumbat electoral.
Avant la sedia da la cumissiun da l'UE a Brüssel èn las bandieras vegnidas messas a mesa asta per commemorar a las unfrendas. Ins stettia davos la populaziun a Barcelona ed en Spagna, scriva la cumissiun da l'Uniun europeica.
Er Mallorca rinforza mesiras da segirezza
L'insla spagnola da Mallorca rinforza sias mesiras da segirezza. Suenter las attatgas terroristicas a Barcelona e Cambrils segireschia la chapitala da Mallorca, Palma, ses center e plazzas centralas cun barrieras da betun. Quai han communitgà las autoritads. Il ministeri da l'intern spagnol haja ordinà las mesiras.
RR novitads 06:00 ++