-
Bild 1 von 14Legenda: Durant tut la notg han las forzas da salvament cuntinua cun lur tschertga en il lieu da Pescara del Tronto. Keystone -
Bild 2 von 14Legenda: Almain 247 morts tras il terratrembel da la notg da mardi sin mesemna - quai è la bilantscha fatala da la notg passada. Keystone
-
Bild 3 von 14Legenda: Ina persuna blessada vegn salvada ad Amatrice - passa 100 autras persunas èn anc sparidas. Keystone
-
Bild 4 von 14Legenda: Pli nagina chasa abitabla - abitants dad Accumoli, il di suenter il terratrembel. Keystone
-
Bild 5 von 14Legenda: Devastaziun a Pescara del Tronto - la regiun pertutgada è muntagnarda, quai ch'engrevgescha l'agid e l'infurmaziun. Keystone
-
Bild 6 von 14Legenda: Amatrice è in dals lieus pertutgads dal terratrembel da la notg passada. Keystone
-
Bild 7 von 14Legenda: L’ura dal clutger dad Amatrice è stada salda la notg al mument dal terratrembel. Keystone
-
Bild 8 von 14Legenda: Ina blessada vegn salvada da las forzas d'agid or da las ruinas. Keystone
-
Bild 9 von 14Legenda: In champ d’emprim agid dador l’ospital ad Amatrice. Keystone
-
Bild 10 von 14Legenda: Bleras persunas han stuì passentar il rest da la notg or'en il liber. Keystone
-
Bild 11 von 14Legenda: Glieud en ina via ad Amatrice. Reuters
-
Bild 12 von 14Legenda: Amatrice – la bun’ura suenter il terratrembel. Keystone
-
Bild 13 von 14Legenda: Prim agid a l'ospital dad Amatrice en la regiun pertutgada dal terratrembel. Keystone
-
Bild 14 von 14Legenda: Ina charta dal Servetsch geologic dals Stadis Unids (USGS) mussa l’epicenter dal terratrembel da 6,1 en ina profunditad da 10 kilomters. Keystone
- Las 03:36 en la notg dal mardi sin mesemna squassa en la profunditad da 10 kilometers la terra da l’Italia Centrala cun ina fermezza da 6,2.
- La regiun pertutgada è en l’Appenin al nord-vest da Roma. Igl è muntagnard. Quai engrevgescha l'agid e la communicaziun.
- Il dumber dals morts è creschì fin oz a bunura sin 247 morts. 368 blessads èn fin uss vegnids transportads or da la regiun dad Amatrice ed Accumoli. Las forzas da salvament tschertgan vinavant.
- Persunas svizras na paran betg dad esser tranter las unfrendas. Quai aveva communitgà il Departament federal d'affars exteriurs mesemna durant il di.
- Las autoritads localas congualan il terratrembel cun quel en il lieu talian da L’Aquila l’onn 2009.
Durant la notg s'han verifitgadas las temas da las autoritads da salvament en la regiun da l'Italia Centrala: La cifra da morts è creschida durant la notg sin almain 247 persunas. Ed anc adina n'èn intgins lieus da la regiun betg cuntanschibels.
Dapi il terratrembel da la notg dal mardi sin mesemna è vegnida squassada la regiun da passa 250 terratrembels posteriurs. Ils lieus Amatrice, Accumoli, Pescara del Tronto ed Arquata del Tronto èn pertutgads da las pli grondas devastaziuns. Parts da lur quartiers na datti betg pli.
Er il di suenter il terratrembel n'èn intgins lieus anc adina betg cuntanschibels, perquai che las vias èn bloccadas. En pli è la regiun pertutgada dal terratrembel muntagnarda. Quai engrevgescha la lavur dals servetschs d'agid - per salvar, dentant era per infurmar. Da las persunas ch'èn vegnidas per la vita datti pir uras suenter il terratrembel communiaziuns uffizialas. Quantas persunas ch'èn anc sparidas n'è la bunura anc betg vegnì rapportà.
Regiun dad Amatrice ed Accumoli la pli pertutgada
La mesadad da la vischnanca dad Amatrice - radund 140 kilometers al nord-vest da Roma - saja dada ensemen, ha ditg il burgamester Sergio Pirozzi. Las vias èn bloccadas, l'electricitad è vegnida interrutta. Pirozzi tema, che bleras persunas èn vegnidas sutterradas da las chasas. Uss preparian els in lieu per baras, ha el ditg a l’agentura da novitads Ansa.
Era Accumoli è donnegià grevamain dal terratrembel. En in discurs da telefon cun l’emettur RaiNews24 ha il burgamester Stefano Petrucci dumandà per agid.
2’500 persunas n’hajan betg pli in tetg sur il chau. Gnanc in'unica chasa dad Accumoli saja anc abitabla. Per las persunas senza tetg duain vegnir construidas duas citads da tenda. Ina duai vegnir a Pescara e l'autra a Arquata del Tronto. Ulteriuras persunas duajan vegnir sut tetg en hallas da sport.
Ina situaziun congualabla a L'Aquila l'onn 2009
Burgamester Petrucci ha congualà la situaziun actuala cun quella da L'Aquila. Tras in terratrembel l'onn 2009 eran lura mortas passa 300 persunas. L'Aquila è mo en ina distanza da radund 30 kilometers lingia directa dad Amatrice.
Pervi da sia posiziun geografica vegn l’Italia adina puspè squassada da terratrembels.
President da la Confederaziun condolescha
Il president da la confederaziun Johann Schneider-Ammann ha condolà a l'Italia suenter il terratrembel.
Sin Twitter ha scrit Schneider-Ammann che la Svizra saja en patratgs tar las unfrendas.
RR novitads 06:00 ++