Il preventiv da CO2 ch'il mund dastga anc emetter per evitar ina ferma stgaudada è pli pitschen che presumà. Per ch'il clima global na sa stgauda pli fitg che 1,5 grads, possian ins mo emetter la mesadad da quai ch'ins ha pensà. 250 gigatonnas CO2 poi anc vertir, e suenter vegnia la stgaudada globala a surpassar 1,5 grads, cumpareglià cun il temp avant l'industrialisaziun ed il cumenzament da l'emissiun da CO2.
Enfin uss han ins supponì ch'i possia vertir 500 gigatonnas fin che la stgaudada globala surpassa 1,5 grads. Quellas prognosas èn vegnidas da l'IPCC, il cussegl da l'ONU che sa fatschenta cun la stgaudada globala. Ils scienziads e las scienziadas ch'han fatg la nova prognosa, sa basan sin novas datas e megliers models da calculaziun. Il rapport è publitgà en il schurnal scientific «Nature Climate Change».
Tenor quest rapport è il preventiv da CO2 gia duvrà si il 2028, sch'i dat uschè bler emissiuns da CO2 fin lura sco en il 2022. Per restrenscher il stgaudament global sin 1,5 grads, na dastgass ins emetter nagin gas da serra pli suenter. Tenor l'IPCC smanatscha tar ina stgaudada pli ferma che 1,5 grads «consequenzas irreversiblas» ed eventualmain desastrusas per l'umanitad.
