Exteriur - Policists mazzads a Dallas - tregant è identifitgà

L'impurtant en furma concisa:

• tregants zuppads prendan en mira policists durant ina demonstraziun
• 5 policists moran, 6 vegnan blessads
• 3 persunas suspectadas arrestadas
• 1 ulteriur suspectà ch'era sa zuppà è vegnì mazzà dad in roboter da bumba da la polizia
• en bleras citads datti protests cunter la violenza da la polizia

Tenor indicaziuns dal schef da polizia da la citad èn tschintg policists vegnids mazzads. Sis sajan vegnids blessads. Las autoritads èn da l’avis ch’ils policists èn vegnids attatgads da dus tregants spezialisads. Els hajan planisà lur attatga cun armas da precisiun minuziusamain.

Co ch’il schef da polizia da Dallas ha communitgà haja il suspectà ch’è vegnì mazzà ditg avant sia mort ch’el haja vulì mazzar policists alvs. L’um aveva sa zuppà durant uras en ina chasa da parcar. La fin è el vegnì mazzà da la polizia cun material explosiv ch’in roboter ha transportà en sia vischinanza.

Escalaziun a l'ur da demonstraziun paschaivla

Avant avevi dà protests paschaivels cunter la violenza da la polizia envers Afroamericans - a Dallas, ma era en autras citads americanas.

Raschun per las protestas èn dus acziuns da polizia a Minnesota e Louisiana: entaifer dus dis èn vegnids sajettads dus Afroamericans da policists.

Obama pretenda refurmas

Gia avant la demonstraziun e l’attatga sin ils policists aveva il president american Barack Obama pretendì refurmas tar la polizia. Suenter che quella aveva sajettà giu dus Afroamericans ha ditg Obama a l'ur da l'inscunter suprem da la NATO a Warschau, che quai na saja betg mo in tema dals nairs mabain in che pertutgia tut ils Americans.

Il president ha appellà als Americans da betg crudar enavos en il muster da reacziun rutinà. A moda emoziunala ha Obama cità pliras statisticas che cumprovan la discriminaziun d'Afroamericans en il mintgadi.

Ils dus incidents sajan sintomatics per l'inegualitad tar l'apparat da polizia american.

RR novitads 07:00++