Sco ch'ils pumpiers da Copenhagen han communitgà, sajan structuras che portan vegnidas donnegiadas. Che l'entir bajetg pudess dar ensemen, na quintan las forzas d'intervenziun il mument betg. Gia dà ensemen èn parts dal tetg – tranter auter er la tur-baselgia caracteristica.
La bursa istorica a Copenhagen è vegnida bajegiada l'entschatta dal 17avel tschientaner, e lur tur-baselgia vala sco monument caracteristic per la chapitala dal Danemarc. En la veglia bursa datti ina gronda collecziun d'art. Videos mussian sco persunas portan ora quels maletgs or dal bajetg. Il mument vegn il bajetg atgnamain restaurà ed è zuglià en puntanadas.
Pliras vias en la vischinanza dal bajetg èn serradas, sco la polizia scriva sin X (pli baud Twitter). Vinavant va la polizia da quai anora che la regiun resta serrada per in temp pli lung.