-
Bild 1 von 10Legenda: Malencurada naziunala al palazzi Elysee a Paris. Il cumenzament uffizial dals 3 dis è damaun. Keystone -
Bild 2 von 10Legenda: François Hollande visita in spital a Nizza. Var 50 persunas èn anc en privel da vita. Keystone
-
Bild 3 von 10Legenda: Nizza cun la Promenade des Anglais vida e la riva dal mar deserta. Keystone
-
Bild 4 von 10Legenda: Ina bartga da polizia patrugliescha questa bun'ura lung la Promenade des Anglais. Keystone
-
Bild 5 von 10Legenda: Baras cuvernadas cun tuaglias a la Promenade des Anglais a Nizza. Keystone
-
Bild 6 von 10Legenda: Il camiun duvrà da l'attatgader - il vehichel era vegnì prendì a fit avant intgins dis en la regiun Provence-Alpes-Còte d'Azur. Keystone
-
Bild 7 von 10Legenda: Nizza - la bun'ura suenter l'attatga cun camiun sin la Promeande des Anglais. Keystone
-
Bild 8 von 10Legenda: Nizza: Las ambulanzas sin il lieu suenter l'attatga che ha custà la vita ad almain 80 persunas e blessà passa 50 persunas. Keystone
-
Bild 9 von 10Legenda: La Promenade des Anglais a Nizza è serrada giu da polizia e militari. Keystone
-
Bild 10 von 10Legenda: Schuldada franzosa e polizia segireschan l'areal suenter ch'almain 80 persunas èn vegnidas mazzadas a Nizza. Reuters
Il di da festa naziunala è il di il pli simbolic per la nov’istorgia franzosa. Cun conquistar la praschun da la Bastille a Paris aveva cumenzà ils 14 da fanadur 1789 la revoluziun franzosa. Ella è la basa per las valurs ch’il stadi franzos porta anc adina en sia parola, numnadamain «liberté, égalité, fraternité».
Igl è la saira enturn las 23:00 ch’ina fulla da millis da persunas è sa radunada sin la Promenades des Anglais a Nizza. Els èn vegnids per festivar il di da festa naziunal da la Frantscha, il «quattorze juillet».
Il manischunz dal camiun alv
Dal medem temp sa metta en viadi in camiun alv. Al guvernagl è in franzos da 31 onns cun ragischs tunesianas. In um ch’è enconuschent a la polizia pervi da delicts pitschens, ma betg per ina tenuta islamistica radicala, chattan ora las autoritads suenter. En in video d'ina perditga ves’ins co ch'il camiun alv sa metta en viadi sin la Promenada ch’è serrada per il traffic.
84 umans moran sin la Promenade des Anglais
En il video è da vesair co il manischunz accelerescha, lura svanescha el davos las palmas. Cun 80 kilometers l’ura charra el tras la fulla e prenda intenziunadamain en mira la glieud; gronds e pitschens, senza misericordia.
84 persunas vegnan mazzadas, passa 200 blessadas. Suenter dus kilometers arriva la polizia da fermar l'attatgader. Sinaquai cumenza el a sajettar e vegn la finala sajettà giu da la polizia franzosa.
Il manischunz è tenor rapports da l'emettur M6 rivà tras las controllas da segirezza cun dar avant ch'el haja da furnir glatsch.
Nizza - audios RR
La bilantscha suenter l'attatga
Quai è la bilantscha da las autoritads franzosas il venderdi a mezdi . Tranter ils morts èn era almain duas persunas da la Svizra, sco la chanzlia federala ha communitgà venderdi suentermezdi. I sa tractia d'ina dunna e d'in uffant. Ulteriuras unfrendas svizras na sajan betg exclusas. Entant èn er experts svizzers viagiads a Nizza ed a Marseille.
Il president franzos François Hollande ha discurrì anc la notg dad «in'attatga cun caracter terroristic». Il stadi d'urgenza vegn mantegnì per trais ulteriurs mais.
Anc intginas uras avant l’attatga da Nizza aveva Hollande annunzià da vulair terminar la mesira d’urgenza la fin da fanadur.
Var 50 persunas en anc en privel da vita
Quai ha il president franzos François Hollande ditg durant sia visita a Nizza. El ha era discurrì da bleras unfrendas che derrivian da pajais esters. Tenor Hollande è l'attatga succedida il di da la festa naziunala perquai che quai saja la festa da la libertad.
Attentader identifitgà - motiv manca
L'um da Nizza n'eria betg encounschent als servetschs secrets franzos. Sia acziun mussia però ch'i pudess dar ina colliaziun cun extremists islamics, ha ditg il procuratur public François Molins.
Il marz passà era il Tunesian da 31 onns vegnì sentenzià cun in chastì cundiziunal da 6 mais. Quai pervi da smanatscha, violenza, enguladitsch e donn material.
Ina brev da confess n'han ins betg chattà dentant ina arma automatica cun muniziun, pliras atrappas d'armas ed in telefonin che sa chattavan en il camiun. Actualmain cuntinuescha la tschertga dals motivs e da pussaivlas colliaziuns cun gruppas terroristicas.
RR novitads 06:00 / ++