(sursilvan) Igl atun vargau sun jeu sedecidida da far enzatgei bien per miu tgierp. Il seser uras en ed uras ora sin la sutga da biro lai anavos ses fastgitgs. Era sche jeu sesprovel da semuentar bia en miu temps liber, hai jeu sentiu il basegns per activar quellas parts dil tgierp che vegnan tralaschada el mintgadi.
Las empremas uras el center da fitness han purtau igl effect giavischau. La barba gat ha spert schau salidar ! Sper l’activaziun da mia musculatura ein era biars contacts vegni reactivai. Sco ei para s’entaupa la mesa Surselva el gym. Bi, da seveser cun persunas piarsas ord ils egls avon onns. Per enqual parochiana e parochian forsa era surprendent da veser mei en in’autra rolla ch’ en quella dalla collaboratura pastorala.
Beinspert sun jeu sedumandada, tgei che marscha leu endretg, che tons carstgauns sesentan plidentai e motivai da sededicar al trenament corporal. E consequentamein sun jeu era sedumandada, tgei che la Baselgia savess emprender per animar commembras e commembers per in trenament regulau dall’olma ?
La participaziun da persunas da tuttas generaziuns e status socials che visetan regularmein il center da fitness ha fatg surstar mei. Beinspert sun jeu sedumandada, tgei che marscha leu endretg, che tons carstgauns sesentan plidentai e motivai da sededicar al trenament corporal che cuosta beinenqual daguot suadetsch, temps e disciplina. E consequentamein sun jeu era sedumandada, tgei che la Baselgia savess emprender per animar commembras e commembers per in trenament regulau dall’olma ?
Forsa che la cumparegliaziun fa surstar, denton cheu dat ei enqual parallela. Ch’il trenament el gym rinforza la musculatura e survescha cheutras buca mo alla cumparsa exteriura mobein era alla sanadad, ei evident. Forsa che nus essan denton memia pauc pertscharts ch’ era il trenament dall’ olma rinforza nus e fa nus fitas e fits pil mintgadi. Studis demuossan che l’oraziun, la meditaziun, il reflectar igl agen agir e patertgar, il viver ord la speronza digl evangeli, rinforzan l’olma. Il trenament el gym prepara denter auter las atletas ed ils atlets per occurenzas sportivas che lai sentir ils cunfins. Semegliont eis ei tier il trenament dall’olma che vegn dabien en cass che lain sentir ils cunfins emoziunals, p.ex. en temps da crisas.
Autras parallelas ? Schebein il gym sco era la baselgia porschan loghens e muments d’interrupziun dil mintgadi. Omisdus loghens ein concepi aschia, ch’els lain anflar sigl entir mund ina certa structura che porta orientaziun. Omisduas spartas pretendan ina disciplina per ina pratica regulara, in luvrar vid sesez. Ed omisdus trenaments lain anavos in bien sentiment, ina certa satisfacziun.
La gliesta dallas parallelas seschass aunc cuntinuar. Aviarta resta la damonda, tgei ch’ils centers da fitness fan meglier che la Baselgia, per motivar al trenament. Veis Vus, caras audituras (lecturas) e cars auditurs (lecturs) ina riposta ? Jeu sun aviarta per Vos tips.