La carriera da Peter Reber ha cumenzà l’onn 1968 cura ch’el ha fundà ensemen cun Susan Schell e Marcel Dietrich il trio Peter, Sue & Marc. Gia l’onn 1971 èn els sa preschentads l’emprima giada per la Svizra a l'Eurovision Song Contest cun la chanzun «Les illusions de nos vingt ans» e cuntanschì il 12avel plaz. Il grond success han els gì tschintg onns pli tard cun la chanzun «Djambo Djambo» che ha manà els sin il quart plaz. Il 1979 han els danovamain represchentà la Svizra a l'ESC e cuntanschì plaz 10 cun la chanzun «Trödler & Co.». La quarta giada han els represchentà la Svizra dus onns pli tard cun il hit «Io senza te». Uschia èn els ils sulets participants che han concurrenzà en quatter differentas linguas. Il 1971 per franzos, il 1976 per englais, il 1979 per tudestg ed il 1981 per talian.
Plinavant ha Peter Reber cumponì duas ulteriuras chanzuns per l’Eurovision Song Contest. Il 1977 la «Swiss Lady» per Pepe Lienhard e l’onn 1980 la chanzun «Cinèma» per la chantadura Paola.
Cun la chanzun «Io senza te» na va betg mo la carriera a l'ESC, mabain era dal trio Peter, Sue & Marc a la fin.
Peter Reber ha dentant cuntinuà cun sia passiun. Il 1982 ha cumenzà si’aventura sin la bartga «Cindy». Durant quest temp ha el scrit ina massa hits sco per exempel: «Cindy» u «Jede bruucht sy Insel».
Era «Ds Hippigschpängschtli» da l’album «Ufem Wäg nach Alaska» deriva da quest temp. Anc oz èn sias chanzuns buns semperverds per pitschen e grond.
