Dapi onns è Mattiu in grond num da la scena da musica rumantscha. Ed uss cumpara la EP «Da casa», ed el sa legra fitg. Quest di da publicaziun saja in zic sco in natalezi, ha Mattiu ditg al microfon tar Sergio Guetg en il studio RTR.
Er en l’exteriur ha Mattiu blers fans, uschia en la Germania. El na siemia betg da dar gronds concerts en l’ester. In siemi fiss d’ir ina giada sin ina turnea da clubs, cun 100 u 150 persunas en il public, ha il musicist rumantsch ditg. Quest plan haja el per ils proxims onns.
Collavuraziun cun Dabu Bucher
Mattiu lavura cun glieud da la gruppa Dabu Fantastic. El era sin la tschertga d’insatge nov, e ha lura emprendì d’enconuscher Gianluca Giger, oriund da Cuira. Quel è directur musical e bassist da Dabu Fantastic, ed uschia è il contact cun Dabu Bucher sa dà. E Mattiu è cuntent co la lavur cuminaivla funcziuna.
Il rumantsch è ina bella e melodiusa lingua, che vegn per il pli vi bain.
Mattiu ha gì ina giada l’idea d’era chantar per englais. E da quai èn naschidas duas chanzuns ch’èn mez per rumantsch e mez per englais. Gia avant in temp saja el puspè sa decidì per sia lingua materna. La lingua ch’el patratga e ch’el po s’exprimer il meglier.
La gronda part dals proxims concerts suna Mattiu en in trio. El suna la ghitarra ed ils synthesizers, vitiers vegn in pianist ed in musicist per drums e bass. Tar intgins concerts datti tuttina ina furmaziun schlargiada, cura che las soras vegnan a chantar.
Mattiu è in da la natira, in ch’è lià fermamain cun sia patria e ses linguatg. Quai sentan ins era puspè en sia EP actuala «Da casa». En quella tracta il chantautur en sia lingua materna la natira, il dachasa – e metta a cor ina vita bella e d’aspirar quai che fa cuntent.
Tranter viadis, concerts, chatscha e Laax
Dachasa è Mattiu per il mument en ina simpla chasa a Laax. Là è el dentant be cura ch’el n’è betg sin viadi per dar concerts, per registrar nova musica, ir a chatscha e pestga ubain uschiglio da viadi. El ha ina ferma colliaziun cun sia patria e sia lingua. Perquai è el restà fidaivel al rumantsch per l’EP «Da casa». Quai plascha a blers en la Bassa pervia dal folclorissem, e dat a nus Rumantschas e Rumantschs direct in sentiment d’esser a chasa.
Il cuntegn tracta la patria. Oravant tut en la chanzun cun il medem titel sco l’EP «Da casa» nua ch’il chantautur exprima ses engraziament per il bel sentiment d’esser a chasa. Er en «Buc camutsch» vai en in tschert senn per la patria. La segunda patria da Mattiu è numnadamain la natira ed ils culms. Là, durant la chatscha, ha el era gì l’idea per quella chanzun. Qua vegn anc in auter aspect tiers, in che sa tira tras l’entir disc: la dumonda co viver en quest dachasa. Cuntent, liber, en il preschent e da di tar di. En «Miraclas» chanta el dal laschar enavos temps passads, bunas e schlettas regurdientschas – per avair forza per il mument. D’ina vita simpla chanta el en la chanzun finala «Emblida mai». Pli gugent posseder pli pauc e persuenter pudair suandar finamiras che cuntanteschan. La finamira da Mattiu è gia daditg da pudair viver da sia musica. Per cuntanscher quai ha el cun l’ultima EP «Sur la selva» midà in pau strategia ed è ì sin la tschertga da sia atgna nischa musicala.
Tranter stiva e discoteca
Sias ragischs en la musica da chantautur ed il stil da «ghitarra enturn il fieu da champ» na vegn el betg da snegar. Er en l’EP actuala datti quels bels muments vulnerabels, e la ghitarra è pli u main adina da la partida. El ha dentant er experimentà cun tuns sferics, electronics – per part inspirà da la musica nordica.
Medem sco tar «Sur la selva» datti era questa giada ina chanzun ensemen cun in chor. Uschia datti adina puspè muments agreabels che laschan girar ils patratgs tar ina saira patgifica sin il canapé enzuglià en ina cuverta da launa. Quels vegnan sin «Da casa» dentant adina puspè interruts d’effects electronics – per exempel en «Buc camutsch» cun l'autotune che defurmescha sia vusch ubain tar «Emblida mai» cun in beat modern da pop. Quai po irritar, oravant tut sch’ins taidla l’emprima giada la chanzun. Ma Mattiu è in musicist che para da far en la musica nagut senza in intent. Ed era sch’ils tuns electronics vegnan per part in pau surprendents, survegnan ins l’impressiun che quai è Mattiu sin la tschertga da sia nischa musicala – ses dachasa.
Dal reminent: Qua vai tar ina survista da las publicaziuns rumantschas e grischunas dal 2024: