Dals 2 fin ils 4 da favrer ha gì lieu a Cuira la concurrenza svizra dals chors. Igl è stà la 11avla ediziun dapi l’onn 1988 cura che la concurrenza ha per l’emprima giada gì lieu a Schaffusa. Dapi l’ultima giada han amaturas ed amaturs da chors gì da spetgar in zic pli ditg – l’ultima giada è numnadamain stada 2017 ad Aarau.
En il teater a Cuira èn la sonda e dumengia sa preschentads 20 chors da l’entira Svizra en la categoria «Popchöre» ed en differentas categorias da chors d’uffants e giuvenils. L’emissiun dad oz preschenta ina selecziun da las registraziuns che RTR ha fatg durant quels dis. La dumengia suentermezdi ha medemamain il final e la rangaziun gì lieu en il teater – quai pudais vus guardar qua anc ina giada.
Il teater ha gia ina lunga tradiziun a Cuira. Emprims teaters hai gia dà enturn l'onn 1517. Da far regularmain teater saja pussaivel dapi 1876 e dapi 1959 è il teater en quai lieu nua ch’era ils concerts da quella fin d’emna han gì lieu. In u l’auter chor han forsa era perquai fatg in zic teater durant lur bun 15 minutas preschentaziun ed uschia divertì il vast public betg be cun chantar.
En noss archiv da musica èn da chattar nundumbraivlas registraziuns da chors - en spezial chors rumantschs e grischuns.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
