Olympic Antigua consista da quatter musicists da quatter differentas bands: Yellow Teeth, The Last Moan, Mount Koya e The Thieves. Lur passiun é il blues ed il soul. Inspirads dals labels da musica Stax e Motown han ils quatter amis chattà lur plaz en la scena da musica svizra.
Il num da la band deriva d’in model da ghitarra legendar, numnadamain da la Fender Stratocaster. Artists sco Jimi Hendrix, Eric Clapton ni Buddy Holly han sunà quest model. Questas ghitarras datti en differentas colurs tranter auter era Olympic White ed Antigua White. Ord la cumbinaziun da questas duas colurs resulta il num da la band Olympic Antigua (ev. Foto ghitarra Jimi Hendrix e sia Izabella).
Ina spezialitad da la band è ch’ils musicists n’han betg rollas fixas. Ina giada vid il microfon, ina giada a la ghitarra ubain al bass. Be il battarist Kevin resta fidaivels a ses instrument.
Lur nova chanzun «So long» han els publitgà ils quatter d’avrigl 2024. Ella è l’emprima single da la nova EP «Heavy Heart» che cumpara ils sis da settember. E per il mument pon els sa preschentar durant il matg en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
