Tscherta musica funcziuna per propi pir sin tribuna, ella viva da l’energia da la band, la chantadura e dal public. Il stil criv, pitschnas imperfecziuns e las ramurs dal public contribueschan a la natira dal Blues e Rock ch’è la passiun da l’artista Carmen Cresta. Perquai ha ella l’onn 2023 dà en tut 19 concerts. In da quels concerts en la «Beni’s Backroad Beiz» fin matg 2023 ha ella organisà sez e là fatg las registraziuns per ses album actual.
Ella sezza numna ses stil da musica il Blues Grischun – ina maschaida tranter Blues, Bluesrock e Rock chantà en il dialect grischun e per part per rumantsch. 2019 ha ella publitgà ses album da debut «Aurora» ed è vegnida nominada da RSO sco newcomra da l’onn. Dapi lura hai adina puspè dà nova musica da la giuvna ed ella è sa etablida sco musicista live.
In di senza musica na datti betg tar mai. I fiss in mund fitg trist senza musica!
«Carmen Cresta & Band Live» è ussa ina resumaziun da quel temp da sia emprima publicaziun fin oz e metta sias experientschas sin tribuna sin ina platta. Sin quella ed er en las raits socialas – nua ch’ella è fitg activa – sentan ins sia passiun per la musica. Ses messadi è simpel: Davent cun vossas retegnientschas, dai! Ristgai in saut!
Dapli da nova musica rumantscha e musica da l’entir Grischun chattais qua:
