Ils 23 d’avust 2017, cura che la gronda bova è vegnida giu dal Piz Cengalo, era Madlaina Del Re en chasa communala en Val Bregaglia, sco contabilista da la vischnanca. Ella sa regorda anc bain da quel di ed era vi da la gronda solidaritad en la val. Entant sajan ins puspè turnà a la normalitad, in pass chapibel, di la dunna da 42 onns che lavura en in pensum parzial per Bregaglia Turissem.
Duas vals
Madlaina Del Re-Moder è oriundamain da Malögia, nua ch’ella è creschida si en Engiadina sco figlia d’ustiers. La lingua da famiglia è rumantsch, la scola ha ella frequentà en talian e tudestg. Entant viva la dunna da 42 onns a Montaccio en la Val Bregaglia cun sia famiglia e discurra «Bergiagliot», cun ses figl da quatter onns però rumantsch.
Differentas vias
Suenter avair frequentà in emprendissadi mercantil en l’Hotel Waldhaus, è l’Engiadinaisa sa decidida d’emprender er anc cuschiniera en ina cuschina da quatter stailas. Da quellas enconuschientschas possia ella profitar anc oz sco mamma d’ina famiglia da patchwork.
I dat era tar nus mintagatant spaghets or da la padella. Dentant vegn mintga di verdura e salata sin il plat. Quai faschain nus adina uschia.
Avant 12 onns ha ella realisà in siemi e fabritgà ina chasina en la fracziun da Montaccio en la Val Bregaglia. Quai en la vegliadetgna da 30 onns, senza avair in partenari. Oz saja ella cuntenta d’avair stgaffì in gnieu per ella, sia famiglia ed ils dus chavals.
Empruvar e simplamain far
Ensemen cun ses um ha Madlaina Del Re-Moder era scuvrì ils faziels da tschaira per conservar mangiativas. Gist il dretg mument ha la famiglia cumenzà a producir sez quels products, cun grond success. Insumma sajan els adina averts per novas vias, di la mamma e madrastra da trais uffants.