En las muntognas sur Maiavilla, gist sur il Pass da Son Gliezi, èn da chattar in pèr paucas chasas da Gualsers. Guscha, in anteriur abitadi da Gualsers sin 1'115 meters sur mar. Per l'emprima giada vegn il lieu menziunà l'onn 1366. Da quel temp dentant anc sut il num Mutzen. Uschia han ils abitants e las abitantas dal lieu numnadamain numnà lur dachasa. La glieud giun vallada ha da lez temp dentant discurrì rumantsch. E sch'ins guardava da la vallada vers l'abitadi - vesev'ins surtut ils tscheps da las plantas, ch'ils gualsers stuevan terrar per bajegiar lur abitadi. Quels tscheps vegnan era numnà «cuschas» ed uschia era naschì il num rumantsch Guscha.
La vita a Guscha è stada dira ed uschia ha en quels radund 600 onns adina dapli glieud bandunà igl lieu. Ils onns 1960 ha lura l'armada gì interess da cumprar il terren. Ella ha gì plans d'utilisar Guscha sco zona da segirtad per ina nova plazza da tir tar il Pass da Son Gliezi. L'onn 1969 ha lura bandunà la davosa famiglia Guscha, ed ha survegnì in nov dachasa giun vallada. La plazza da tir è dentant mai vegnì realisada. Uschia che Guscha è stà in lieu bandunà ch'è ì pli e pli en paglia, era causa vandalissem.
Quai è stà il mument cura che l'uniun Pro Guscha è vegnida fundada. Ella ha cumbattì fermamain per pudair cumprar Guscha e mantegnair il lieu. Quai fa l'uniun ussa gia dapi 50 onns, ed ha transfurmà or dal lieu en ruina in lieu ch'envida a far paus e giudair la vista unica. Il giubileum vegn festivà cun in'exposiziun, ch'è questa primavaira da vesair a Maiavilla e l'atun lura a Balzers.
