Ils albierts svizzers per la giuventetgna han gì tantas pernottaziuns sco anc mai il 2023. Sco l'uniun purtadra «Swiss Youth Hostels» communitgescha, hajan ils 49 albierts notà passa 807'000 pernottaziuns. Uschia èn vegnidas cudeschadas 7,4% dapli pernottaziuns che anc l’onn 2022.
Trais quarts dals osps sajan da la Svizra. Quai ch'è radund 3 puncts procentuals dapli ch'il 2019 avant corona. La cumpart da giasts da l'exteriur è dentant stada bunamain puncts procentuals sut il nivel dal 2019.
Las bunas cifras dal 2023 sa manifesteschan er ils emprims mais dal 2024 e pledan per che er l’onn da giubileum ch'ha cumenzà vegnia ad avair success.
Ils albierts svizzers per la giuventetgna festiveschan quest onn il giubileum da 100 onns. A chaschun da la festa da giubileum è er il cusseglier federal Guy Parmelin vegnì beneventà la dumengia a Rapperswil-Jona SG sper il lai da Turitg.
L’entschatta – pia avant 100 onns – è stada l’idea da promover sin basa raschunaivla la furmaziun dal temp liber e da metter a disposiziun ina purschida. Quai han ils albierts svizzers da giuventetgna cuntanschì fitg cler durant blers onns.
L’onn 1924 è la fundaziun d’ina associaziun turitgaisa d’albierts per la giuventetgna stada il crap da fundament per quest gener d’albiert ed il culp da partenza per il turissem da la giuventetgna en Svizra. Oz sa cumpona la rait da l’associaziun d’albierts svizzers per la giuventetgna da 42 agens e set manaschis da franschisa.
