A Grüsch en il Partenz è la dumengia ì a la fin l'Agrischa – la pli gronda fiera d'agricultura en il chantun Grischun. Sco quai ch'il comité d'organisaziun scriva en ina communicaziun a las medias hajan passa 20'000 aspectaturas ed aspectaturs visità la fiera.
Tut en tut saja il comité d'organisaziun cuntent cun la fin d'emna da l'Agrischa. Grazia a tschients gidanters e gidantras saja stà pussibel da purtar l'agricultura pli datiers a la populaziun, uschia il comité d'ogranisaziun.
Alina è Miss Agrischa 2024
La vatga Alina da Tavau ha gudagnà la sonda il tetel da Miss Agrischa 2024 – la premiaziun da vatgas da latg. Passa 250 vatgas da differentas rassas èn vegnidas rangadas dad experts.
Plinavant èn vegnids preschentads chavals, nursas e chauras. Ed er hajan ins declerà al public co reagir sch'ins inscuntra vatgas-mamma. E sco in dals puncts culminants ha dumengia gì lieu la chargiada d'alp.
